अहमदनगर Live24 टीम, 12 फेब्रुवारी 2021:- टॅँकरच्या धडकेत गोंधवणी येथील दिनेश देविदास कहाणे (वय २८) हा तरूण ठार झाल्याची घटना दि. ६ फेब्रुवारी रोजी पुणतांबा रोडवर घडली. याप्रकरणी अज्ञात टॅँकरचालकाविरोधात अपघाताचा गुन्हा दाखल करण्यात आला आहे.
याबाबत पोलिसांनी सांगितले, की दिनेश कहाने हा दि. ६ फेब्रुवारी २०२१ रोजी मित्राला त्याची मोटारसायकल देण्यासाठी सव्वा नऊ वाजेच्या सुमारास गेला होता. रात्री पावने दहा वाजेच्या सुमारास तो चितळीकडे जात असताना आसकर रसवंतीसमोर त्याला टॅँकरने (क्र. एमएच १६ सीसी ८९२२) उडवून दिले. हा अपघात होऊनही टॅँकरचालक न थांबता भरधाव वेगाने निघून गेला.
त्यानंतर त्याला साखर कामगार रुग्णालयात दाखल करण्यात आले. येथे वैद्यकीय अधिकाऱ्यांना त्याला मृत घोषित केले. या फिर्यादीवरून श्रीरामपूर शहर पोलीस ठाण्यात अज्ञात टॅँकर चालकाविरोधात गुन्हा रजिस्टर क्रमांक ७८/२०२१ नुसार भा.दं.वि. कलम २७९, ३०४ (अ), ४२७ सह मोटार वाहन कायदा कलम १८४, १३४ (अ) (ब), १७७ प्रमाणे गुन्हा दाखल करण्यात आला आहे.
त्याच्या पश्चात आई, वडील, पत्नी, मुलगा, मुलगी, भाऊ, बहिण असा परिवार आहे. त्याच्या निधनाने परिसरात हळहळ व्यक्त करण्यात येत आहे.