Vladimir Putin Networth
अहमदनगर Live24 टीम, 27 फेब्रुवारी 2022 :- रशियाचे राष्ट्राध्यक्ष व्लादिमीर पुतिन यांची गणना जगातील सर्वात शक्तिशाली नेत्यांमध्ये केली जाते. पुतीन हे दोन दशकांहून अधिक काळ रशियाचे सर्वोच्च नेते आहेत.
आता रशियाने युक्रेनवर केलेल्या हल्ल्यानंतर पुतीन पुन्हा जगभरात चर्चेचे केंद्र बनले आहेत. सगळीकडे वेळोवेळी लोकांकडे किती संपत्ती आहे, याचे आकलन करण्याचा प्रयत्न केला जातो. काही अंदाजानुसार, पुतिन यांची संपत्ती $200 बिलियनपेक्षा जास्त आहे.
हा हिशोब बरोबर असेल तर पुतिन यांच्याकडे जगातील सर्वात श्रीमंत व्यक्ती मानल्या जाणाऱ्या अमेरिकन उद्योगपती एलोन मस्क यांच्यापेक्षा जास्त संपत्ती आहे.
पुतिन यांची संपत्ती २०० अब्ज डॉलर्सपेक्षा जास्त – अमेरिकन-ब्रिटिश फायनान्सर ‘बिल ब्राउडर’ हे रशियन घडामोडींचे सखोल तज्ञ मानले जातात.
ते हर्मिटेज कॅपिटल मॅनेजमेंटचे सीईओ आणि सह-संस्थापक आहेत, ही कंपनी एकेकाळी रशियातील सर्वात मोठ्या पोर्टफोलिओ गुंतवणूकदारांपैकी एक होती.
ब्राउडर हे नंतर पुतिन यांच्या रागाला बळी पडले आणि त्यांना रशियातून माघार घ्यावी लागली. ते सध्या पुतिन यांच्या सर्वात कट्टर टीकाकारांपैकी एक मानले जातात. 2017 मध्ये अमेरिकन सिनेटसमोर साक्ष देताना त्यांनी पुतिन यांच्या संपत्तीचे मूल्यांकन सादर केले.
ब्राउडरच्या दाव्यावर विश्वास ठेवला तर रशियाच्या राष्ट्राध्यक्षांकडे 2017 मध्येच $200 बिलियनपेक्षा जास्त संपत्ती होती. ब्लूमबर्ग अब्जाधीश निर्देशांकानुसार, एलोन मस्कची एकूण संपत्ती सध्या $198.6 अब्ज आहे. पुतीन यांच्या संपत्तीत गेल्या 5 वर्षात वाढ झाली असावी, त्यामुळे त्यांच्याकडे मस्कपेक्षा जास्त संपत्ती असल्याचा अंदाज आहे.
सर्वोच्च अब्जाधीशांना अर्धी मालमत्ता सोपवण्याचा आदेश – ब्राउडर यांनी असा युक्तिवाद केला की, पुतिन यांनी रशियाच्या सर्वोच्च अब्जाधीशांना पदभार स्वीकारल्यानंतर अवघ्या काही वर्षांनी त्यांची अर्धी संपत्ती देण्याचे आदेश दिले होते.
2003 मध्ये रशियन उद्योगपती मिखाईल खोडोरकोव्हस्कीला अटक केल्यानंतर पुतिन यांनी असा आदेश दिल्याचे ब्राउडर यांनी सिनेटला सांगितले.
युकोस या तेल कंपनीचे मालक खोडोरकोव्स्की त्यावेळी रशियातील सर्वात श्रीमंत व्यक्ती होते. अटकेनंतर फसवणूक केल्याप्रकरणी ते तुरुंगात होते.
या कारणास्तव पुतिन यांच्या संपत्तीची गणना करणे कठीण – पुतिन यांच्या संपत्तीची मोजणी करणे हे अन्य काही तज्ञ निराधार मानतात. अशा लोकांच्या तर्कानुसार पुतिन यांच्याकडे एवढी संपत्ती आहे की, त्यांचा शोध लावता येणार नाही.
देशातून हद्दपार झालेले रशियन उद्योगपती सर्गेई पुगाचेव्ह यांनी 2015 मध्ये द गार्डियनमध्ये याबाबत एक लेख लिहिला होता. पुगाचेव्ह त्या लेखात म्हणतात की, रशियन फेडरेशनच्या हद्दीत जे काही आहे, पुतिन प्रत्येकाला त्यांची वैयक्तिक मालमत्ता मानतात. या कारणास्तव, पुतीन यांच्या संपत्तीचे मूल्यांकन करण्याचा कोणताही प्रयत्न यशस्वी होऊ शकत नाही.
फोर्ब्स किंवा ब्लूमबर्गच्या यादीत पुतिन यांचे नाव का नाही? – फोर्ब्स किंवा ब्लूमबर्ग या प्रसिद्ध मासिकांच्या यादीत व्लादिमीर पुतिन यांचे नाव नाही, जे अब्जाधीशांची यादी करतात. फोर्ब्सने 2015 मध्ये म्हटले होते की, पुतिन यांच्याकडे $ 1 अब्ज किंवा त्याहून अधिक संपत्ती आहे हे सत्यापित करण्यात ते सक्षम नव्हते.
याच कारणामुळे त्यांनी पुतीन यांना अब्जाधीशांच्या यादीतून दूर ठेवण्याचा निर्णय घेतला आहे. फोर्ब्स किंवा ब्लूमबर्ग कदाचित पुतिनच्या निव्वळ संपत्तीचा मागोवा घेणार नाहीत, परंतु बरेच विश्लेषक प्रयत्न करत आहेत.
पनामा पेपर्स, पेंडोरा पेपर्समध्ये हे उघड झाले आहे – रशियन राजकीय विश्लेषक स्टॅनिस्लाव बेल्कोव्स्की देखील ब्राउडरप्रमाणे पुतिन यांच्यावर टीका करतात.
त्यांनी द ब्यूरो ऑफ इन्व्हेस्टिगेटिव्ह जर्नलिझमसाठी 2012 मध्ये पुतिन यांच्या संपत्तीचा अंदाज लावला होता आणि त्यांच्या म्हणण्यानुसार, तेव्हा पुतिन यांच्याकडे 70 अब्ज डॉलरची संपत्ती होती.
बेल्कोव्स्कीने हे मूल्यांकन रशियन अध्यक्षांच्या गॅझप्रॉम आणि सर्गुटनेफ्तेगास सारख्या रशियन तेल-गॅस कंपन्यांमधील वैयक्तिक भागभांडवलांवर आधारित केले.
काही काळापूर्वी, पनामा पेपर्स आणि पॅंडोरा पेपर्स सारख्या खुलाशांमध्ये पुतिन यांच्या संपत्तीबद्दल बरीच माहिती समोर आली होती ज्यामुळे जगभरात खळबळ उडाली होती.
पुतीन यांच्या निकटवर्तीयांनी त्यांच्या राष्ट्राध्यक्षांसाठी टॅक्स हेवन देशांमध्ये अब्जावधींची संपत्ती जमा केल्याचे सांगण्यात आले.