WhatsApp Security: व्हॉट्सअॅप (WhatsApp) हे खूप लोकप्रिय मेसेजिंग अॅप आहे. हे जगभर वापरले जाते. भारतातही अनेक लोक याचा वापर प्राथमिक मेसेजिंग अॅप (Primary messaging app) म्हणून करतात. यामुळे यामध्ये खाते सुरक्षित ठेवणे अत्यंत आवश्यक आहे.
यासाठी व्हॉट्सअॅप एका नवीन सुरक्षेवर काम करत आहे. WABetainfo ने याबाबत वृत्त दिले आहे. रिपोर्टनुसार, व्हॉट्सअॅप डबल व्हेरिफिकेशन सिस्टम (Double verification system) वर काम करत आहे. यामुळे युजरसाठी अॅपची सुरक्षा वाढेल.
रिपोर्टमध्ये असे सांगण्यात आले आहे की, जेव्हा कोणी नवीन सिक्युरिटीच्या परिचयासह दुसऱ्या डिव्हाइसवर व्हॉट्सअॅप अकाऊंटमध्ये लॉग इन करण्याचा प्रयत्न करेल, तेव्हा त्याला अतिरिक्त सत्यापन कोड (Additional verification codes) द्वारे याची पुष्टी करावी लागेल.
डबल व्हेरिफिकेशन सिस्टम याप्रमाणे काम करू शकतो –
व्हॉट्सअॅप सध्या पुरवत असलेल्या सुरक्षिततेसह, जेव्हा एखादा वापरकर्ता लॉग इन करतो तेव्हा त्याला 6-अंकी सत्यापन कोड द्यावा लागतो. रिपोर्टमध्ये सांगण्यात आले आहे की, पहिल्या कोडची पडताळणी झाल्यानंतर यूजर्सला दुसरा 6 अंकी कोड द्यावा लागेल.
याबाबत युजरला एक अलर्ट मेसेज (Alert message) ही पाठवला जाईल, ज्यामध्ये त्याला लॉगिन प्रयत्नाबाबत माहिती दिली जाईल. याद्वारे यूजर्सला लगेच कळेल की कोणीतरी त्यांचे अकाउंट ऍक्सेस करण्याचा प्रयत्न करत आहे.
दुसऱ्या सिक्युरिटी कोड (Security code) ची (6-अंकी) माहिती असल्याशिवाय कोणीही WhatsApp खात्यावर लॉग इन करू शकणार नाही. असे अनेक घोटाळे सध्या पहायला मिळत आहेत जिथे स्कॅमर व्हॉट्सअॅप खात्यावर प्रवेश करतात. हे वैशिष्ट्य असे घोटाळे टाळण्यास मदत करेल. तसेच हे वैशिष्ट्य अद्याप विकासाच्या टप्प्यात आहे. पण, तो लवकरच प्रदर्शित होईल, असे मानले जात आहे.