Maharashtra News
Maharashtra News : मेट्रो मार्ग २-अ आणि ७ तसेच मोनोरेलमुळे मुंबई महानगर प्रदेश विकास प्राधिकरण (एमएमआरडीए) तोट्यात चालले आहे. यंदाच्या आर्थिक वर्षात ८०० कोटी रुपयांपेक्षा जास्त तोटा झाल्याचा अंदाज व्यक्त करण्यात येत आहे.
या ८०० कोटींमध्ये एकट्या मोनोरेलच्या तोट्यांची ५०० कोटींहून अधिक रक्कम समाविष्ट असल्याचे आढळून आले आहे. त्या मोनोरेल एमएमआरडीएसाठी पांढरा हत्ती ठरत असल्याचे दिसून आले आहे.
दहिसर ते डी. एन. नगर मेट्रो २-अ आणि दहिसर पूर्व ते अंधेरी पूर्व मेट्रो ७, तर मोनोरेल चेंबूर ते जेकब सर्कल मार्गे वडाळा दरम्यान धावत आहे. एमएमआरडीए वरिष्ठ अधिकाऱ्यांनी दिलेल्या माहितीनुसार, मेट्रो २ अ आणि ७ सुरू होऊन केवळ १ वर्ष काही महिने उलटले असले तरीही ३१ मार्च २०२३ पर्यंत २८०.७४ कोटी रुपयांचा तोटा झाल्याचे दिसून आले आहे.
एप्रिल २०२२ मध्ये आंशिक उद्घाटन झाल्यापासून एकूण ३५.१ किमी लांबीच्या या दोन मेट्रो मार्गांनी ४१.२६ कोटी रुपयांची कमाई केली आहे. गेल्या आर्थिक वर्षात ३२२ कोटी रुपये खर्च झाले. या दोन मार्गांवर दररोज सुमारे २.१० लाख प्रवासी प्रवास करत असतानाही हे नुकसान होत असल्याचे सांगण्यात आले आहे. दुसरीकडे, चेंबूर ते महालक्ष्मी दरम्यान फेब्रुवारी २०१४ पासून धावणाऱ्या मोनोरेलमुळे सुरुवातीपासून तोटा असल्याचे दिसून आले होते.
सध्या मुंबई मोनोरेलची सरासरी प्रवासी संख्या जवळपास १० हजार आहे आणि ट्रेनची वारंवारता दर २५ मिनिटांनी आहे. २०२२-२३ मध्ये एकूण ३६.३६ लाख प्रवाशांनी भारतातील एकमेव अशा सार्वजनिक वाहतूक व्यवस्थेचा प्रवास केला. २०२३- २४ मध्ये मुंबई मोनोरेल ५४२.६३ कोटी रुपयांच्या अंदाजे खर्चाच्या तुलनेत १३.६४ कोटी रुपये कमाई करेल.
त्यामुळे चालू वर्षात अंदाजे ५२८ कोटी रुपयांचे नुकसान होणार आहे. निम्मा खर्च नवीन मोनोरेल गाड्यांच्या खरेदीसाठी केला जाईल, त्यापैकी पहिला खर्च या वर्षाच्या अखेरीस मेधा सर्वो ड्राईव्ह या कंपनीच्या माध्यमातून केला जाईल. एमएमआरडीएने एकूण १० मोनोरेल ट्रेन सेट मागवले आहेत आणि सध्या ११ मोनोरेल ट्रेन मुंबईत आहेत.
मेट्रो २-अ आणि ७ (३१ मार्च २०२३ पर्यंत) खर्च : ३२२ कोटी रुपये महसूल : ४१.२६ कोटी रुपये तोटा : रु. २८०.७४ कोटी
मोनोरेल (२०२३-२४)
खर्च : ५४२.६३ कोटी रुपये
महसूल : १३.६४ कोटी रुपये
तोटा : ५२८.९९