Monsoon Update : सध्या राज्यातील अनेक भागात कडक उन्हाळा पाहायला मिळत आहे. यामुळे नागरिकांना अनेक अडीअडचणींना सामोरे जावे लागत आहे. यातच आता हवामान विभागाने दिलेल्या माहितीनुसार पुढील काही दिवसात संपूर्ण राज्यात पुन्हा एकदा हवामान बिघडणार आहे.
यामुळे काही भागात वादळी वाऱ्यासह पाऊस होण्याची शक्यता आहे. हवामान विभागाने दिलेल्या माहितीनुसार आज आणि 1, 2, 3 जून रोजी राज्याच्या अनेक भागात मान्सूनपूर्व पावसाची शक्यता आहे. तर दुसरीकडे राज्यात 8 जून रोजी मुसळधार पावसासह महाराष्ट्रात मान्सूनचे आगमन होणार असल्याची देखील माहिती हवामान विभागाने दिली आहे.
हवामान खात्याने दिलेल्या माहितीनुसार, पुढील तीन दिवस राज्यातील अनेक जिल्ह्यांमध्ये मेघगर्जनेसह हलका पाऊस पडण्याची शक्यता आहे. आपल्या ताज्या अंदाजात, IMD ने म्हटले आहे की पुढील 72 तासांत मुंबई, ठाणे, पालघर, नाशिक, नंदुरबार, धुळे आणि रायगडमध्ये वादळाची शक्यता आहे.
आज मराठवाडा, कोकण आणि पश्चिम महाराष्ट्रातील काही जिल्ह्यांमध्ये मेघगर्जनेसह जोरदार वाऱ्यासह पाऊस पडण्याची शक्यता आहे. आज सिंधुदुर्ग, कोल्हापूर, सातारा, सांगली, सोलापूर, बीड, लातूर, उस्मानाबाद येथील अनेक भागात मेघगर्जनेसह मध्यम ते जोरदार पाऊस पडू शकतो. तर विदर्भात 27 मेपर्यंत हवामान कोरडे राहणार असून पावसाची शक्यता नाही. यादरम्यान विदर्भात पारा 40 ते 45 अंश सेल्सिअसच्या आसपास राहण्याचा अंदाज आहे. यापूर्वी विदर्भातील बहुतांश जिल्हे आणि मराठवाड्यातील काही भागात वादळी वाऱ्यासह पाऊस झाला होता.
मान्सून आता कुठे पोहोचला आहे?
दरम्यान, नैऋत्य मान्सूनने अंदमान आणि निकोबारमध्ये लवकर प्रगती केली आहे आणि स्थिर प्रगती करत आहे. IMD ने आज असा अंदाज वर्तवला आहे की, पुढील दोन दिवसांत बंगालच्या उपसागराचे आणखी काही भाग, अंदमान समुद्र आणि अंदमान आणि निकोबार द्वीपसमूह पश्चिम मान्सूनच्या पुढील प्रगतीसाठी अनुकूल आहेत. साधारणपणे नैऋत्य मान्सून 22 मे रोजी अंदमानात दाखल होतो. मात्र यंदा मान्सून तीन दिवस आधीच अंदमानात पोहोचला. अंदमानमध्ये शुक्रवारी मान्सूनने दणका दिला. बंगालच्या उपसागरात शनिवारी मान्सूनने विराजमान होण्यास सुरुवात केली. बंगालचा उपसागर पूर्णपणे ओलांडण्यासाठी मान्सूनला आठ दिवस लागू शकतात, त्यानंतर ते कर्नाटकच्या दिशेने पोहोचण्याची शक्यता आहे.
महाराष्ट्रात मान्सून कधी येणार?
मात्र, यंदा केरळमध्ये मान्सून सुरू होण्यास तीन दिवस उशीर होण्याची शक्यता हवामान खात्याने वर्तवली आहे. मात्र मान्सूनच्या पुढील वाटचालीसाठी परिस्थिती अनुकूल राहिल्यास 1 जूनपर्यंत मान्सून केरळमध्ये दाखल होईल. त्यामुळे महाराष्ट्रात 8 जूनपूर्वी आणि मुंबईत 11 जूनपूर्वी मान्सून दाखल होण्याची शक्यता आहे.
