Maharashtra News
Maharashtra News : गणेशोत्सव जवळ आला आहे. कोकणचा मुंबईतील चाकरमानी या उत्सवासाठी कोकणात जायला निघणार आहे. मात्र, मुंबई – गोवा महामार्ग रस्त्यांची अवस्था चंद्रावर पडलेल्या खड्ड्यांसारखी आहे.
यामुळे कोकणाचा प्रवास सुखकर होणे अशक्य असल्याचे म्हणत शिवसेना (ठाकरे) आमदार आदित्य ठाकरे यांनी राज्य सरकारवर जोरदार निशाणा साधला. रस्त्याच्या कामाबाबत उदासीन असलेल्या राज्य सरकारला कोकणी माणूस चांगलाच इंगा दाखवेल, अशी टीकाही त्यांनी केली.
कोकणामध्ये दरवर्षी गणेशोत्सव मोठ्या आनंदात आणि उत्साहात साजरा केला जातो. गणेश उत्सवासाठी लाखो चाकरमानी कोकणात दाखल होतात. मात्र, गणेशोत्सव जवळ आला तरीदेखील मुंबई-गोवा महामार्गाची दयनीय अवस्था कायम आहे.
रस्त्यावर मोठे खड्डे पडल्याने प्रवास करताना चाकरमान्यांना कसरत करावी लागणार आहे. या पार्श्वभूमीवर ट्विट करून अदित्य यांनी शिंदे गट आणि राज्य सरकारवर ही टीका केली आहे.
पालकमंत्री पदासाठी आपापसात भांडणाऱ्या आणि अहंकाराने फुगलेल्या खोके सरकारमधल्या आमदारांना स्वतःच्या मतदारसंघातून जाणाऱ्या महामार्गाचा प्रश्न सोडवता येत नाही ? पाठीशी असलेली महाशक्ती ही मदतीला येत नाही? अशांना कोकणी माणूस इंगा दाखवणारच. असे त्यांनी म्हटले आहे.