Sangram Jagtap News
राष्ट्रवादी काँग्रेसच्या शिर्डी येथील नवसंकल्प शिबिरात सहभागी झालेले अहिल्यानगर विधानसभा मतदारसंघाचे आमदार संग्राम जगताप यांनी ऐनवेळी मंत्रिपदाची संधी हुकल्याचे कारण स्पष्ट केले आहे. तसेच, पुढील काही काळात मंत्रीपद मिळण्याबाबत त्यांनी आत्मविश्वास व्यक्त केला आहे.
तीन वेळा आमदार, पण मंत्रीपद हुकले
संग्राम जगताप हे अहिल्यानगर विधानसभा मतदारसंघातून तिसऱ्यांदा निवडून आले आहेत. महायुती सरकारमध्ये त्यांना यावेळी मंत्रीपद मिळेल अशी चर्चा होती, मात्र ऐनवेळी संधी हुकली. यावर संग्राम जगताप म्हणाले, “मला मंत्रीपद नक्की मिळणार आहे. पुढील अडीच वर्षांच्या आत संधी मिळेल. महायुती सरकारमध्ये तीन पक्ष असल्यामुळे मंत्रीपद वाटपात ओढाताण होत असते. तरीही तिसऱ्या कार्यकाळात मंत्रीपद मिळेल, याचा मला पूर्ण विश्वास आहे.”
भुजबळांच्या नाराजीवरही प्रतिक्रिया
छगन भुजबळ यांच्या नाराजीच्या चर्चांवर बोलताना संग्राम जगताप म्हणाले, “भुजबळसाहेब पक्षाचे ज्येष्ठ नेते आहेत. पक्षातील वरिष्ठ नेते त्यांच्यासोबत संपर्कात आहेत. राजकारणात कमी-जास्त होत असतं, पण ज्येष्ठ नेत्यांचे मार्गदर्शन महत्त्वाचे असते. भुजबळ साहेब शिबिरात सहभागी झाल्याने सकारात्मक वातावरण निर्माण झाले आहे.”
शिबिरातील सहभाग आणि पक्षाची एकजूट
शिबिर स्थळी लावलेल्या प्रत्येक फलकावर छगन भुजबळ यांचे फोटो आहेत, हे अधोरेखित करत संग्राम जगताप यांनी पक्षाच्या एकजुटीवर भर दिला. “भुजबळ साहेब नाराज आहेत, असे वाटत नाही. ते पक्षात कार्यरत असून, त्यांच्या उपस्थितीने ऊर्जा मिळते,” असेही ते म्हणाले.
संग्राम जगताप यांचे हे विधान पक्षातील आगामी राजकीय घडामोडींना वेग देणारे ठरू शकते. आता त्यांच्या मंत्रीपदाच्या प्रतीक्षेचा शेवट कधी होतो, हे पाहणे महत्त्वाचे ठरेल.