Pune Ring Road News
Pune Ring Road News : पुणे आणि पिंपरी चिंचवड शहरातील वाहतूक कोंडी फोडण्यासाठी पुणे रिंग रोडचे काम हाती घेण्यात आले आहे. हा प्रकल्प राज्य रस्ते विकास महामंडळाकडून विकसित केला जात असून याच संदर्भात आता एक नवीन माहिती समोर येत आहे.
या महत्त्वाकांक्षी 138 किमी लांबीच्या पुणे बाह्य रिंगरोड प्रकल्पासाठीचे भूसंपादन लवकरच पूर्ण होईल अशी अपेक्षा आहे. या प्रकल्पासाठीचे भूसंपादन मार्च 2025 पर्यंत पूर्ण होण्याची अपेक्षा आहे, ज्यामुळे बांधकामाचा मार्ग मोकळा होईल.
भूसंपादन पूर्ण झाल्यानंतर प्रत्यक्षात या प्रकल्पाचे बांधकाम सुरू होणार आहे. या प्रकल्पाचे काम एकूण दोन भागात पूर्ण होणार आहे. पूर्व आणि पश्चिम रिंग रोड अशा दोन भागात याचे काम पूर्ण होईल आणि या प्रकल्पाचे काम एकूण 9 टप्प्यात केले जाणार आहे.
यासाठी कंत्राटदारांची देखील नियुक्ती नुकतीच करण्यात आली आहे. महाराष्ट्र राज्य रस्ते विकास महामंडळ (MSRDC) नुसार संपूर्ण प्रकल्प सप्टेंबर 2027 पर्यंत कार्यान्वित होणे अपेक्षित आहे. मुख्यमंत्री देवेंद्र फडणवीस यांच्याबरोबर नुकत्याच झालेल्या पुनरावलोकन बैठकीनंतर एमएसआरडीसीचे उपाध्यक्ष आणि एमएसआरडीसीचे व्यवस्थापकीय संचालक अनिल कुमार गायकवाड यांनी सुधारित टाइमलाइनची घोषणा केली.
अद्ययावत वेळापत्रकांचे पालन सुनिश्चित करण्यासाठी स्थानिक अधिकाऱ्यांना स्पष्ट सूचना देण्यात आल्या आहेत. गायकवाड पुढे म्हणाले, एकदा जमीन अधिग्रहण पूर्ण झाल्यावर बांधकामासाठी अंदाजे अडीच वर्षे लागतील.
शहरातील रहदारीची कोंडी कमी करण्यासाठी डिझाइन केलेले पुणे बाह्य रिंग रोड दोन भागात विभागला गेला आहे. पूर्व रिंग रोड हा पुणे-मुंबई एक्सप्रेस वे वर उरसेपासून पुणे-शतारा महामार्गावरील शिवरे पर्यंतचा 74.08 किमीचा असेल अन पश्चिम रिंग रोड हा 64.45-किमीचा मार्ग असेल जो शिवरेला उरसेसोबत जोडणार आहे.
या प्रकल्पात 83 खेड्यांचा समावेश असेल, पूर्वेकडील विभागात मावळ, खेड, पुरंदर आणि हवेली तालुकास ओलांडून अजून 143 हेक्टर जमीन आवश्यक आहे, तर पश्चिम विभागात मुळशी, हवेली आणि भोर तालुक्यात 64 हेक्टर क्षेत्राची आवश्यकता आहे.
दरम्यान, भूसंपादन प्रक्रियेस गती देण्यासाठी पुणे जिल्हा जिल्हाधिकारी जितेंद्र दुडी यांनी राज्य सरकारकडून 800 कोटी रुपयांची मागणी केली आहे. एमएसआरडीसीच्या अधिकाऱ्याने आश्वासन दिले की या प्रकल्पासाठीचा निधी हा सुरक्षित आहे, गृहनिर्माण व शहरी विकास कॉर्पोरेशनकडून आधीच कर्जाची व्यवस्था सुद्धा केली गेली आहे.