OnePlus India : वनप्लस स्मार्टफोनची लोकप्रियता कोणापासून लपलेली नाही, पण आता या ब्रँडच्या स्मार्टफोन, टॅबलेट आणि इतर उत्पादनांच्या विक्रीवर संकटाचे ढग दाटून आले आहेत. होय, 1 मे पासून किरकोळ बाजारात वनप्लस उत्पादनांची विक्री बंद केली जाऊ शकते.
आपण जाणतोच चिनी ब्रँड OnePlus चा भारतात मोठा पोर्टफोलिओ आहे, जिथे विविध किंमती विभाग आणि विविध श्रेणींची उत्पादने उपलब्ध आहेत. आता कंपनीची उत्पादने ऑफलाइन बाजारातून सहजासहजी खरेदी करता येणार नाहीत. एका प्रसिद्ध अहवालानुसार अनेक हजार स्टोअर्सनी वनप्लस हँडसेट न विकण्याचा निर्णय घेतला आहे.
OnePlus दक्षिण भारतात 23 रिटेल चेनद्वारे सुमारे 4500 स्टोअरमध्ये आपली उत्पादने विकते. ही साखळी आंध्र प्रदेश, तेलंगणा, तामिळनाडू, कर्नाटक, महाराष्ट्र आणि गुजरातमध्ये काम करते. आता या स्टोअर्सनी वनप्लस हँडसेट न विकण्याचा निर्णय घेतला आहे.
या निर्णयामागचे कारणही समोर आले आहे, स्टोअर्सनी अत्यंत कमी नफ्यामुळे हा निर्णय घेतला आहे. दक्षिण भारतीय संघटित रिटेलर्स असोसिएशनचे अध्यक्ष श्रीधर टीएस यांनी सांगितले की, वनप्लसच्या उत्पादनांची विक्री करताना त्यांना गेल्या काही दिवसांपासून खूप त्रास सहन करावा लागत आहे. आणि ही समस्या दूर होऊ शकत नाही. आता असोसिएशनकडे वनप्लस उत्पादनांची विक्री थांबविण्याशिवाय दुसरा पर्याय नाही.
दक्षिण भारतीय संघटित रिटेलर्स असोसिएशनचा भाग नसलेल्या दुकानांवर या निर्णयाचा कोणताही परिणाम होणार नाही. तसेच, ही उत्पादने पूर्वीप्रमाणेच ऑनलाइन स्टोअर्स आणि वनप्लस स्टोअर्सवर उपलब्ध राहतील.