Ranveer Allahbadia : प्रसिद्ध युट्यूबर रणवीर अलाहाबादिया आणि कॉमेडियन समय रैनावर सोशल मीडियावर प्रचंड टीका होत आहे. ‘इंडियाज गॉट लेटेंट’ या शोमध्ये रणवीरने एका स्पर्धकाला विचारलेल्या अत्यंत आक्षेपार्ह प्रश्नामुळे लोकांचा संताप उसळला आहे. त्याच्या या वादग्रस्त वक्तव्यावरून अनेकांनी त्याला ट्रोल करायला सुरुवात केली आहे, तर काहींनी त्याला बॉयकॉट करण्याचीही मागणी केली आहे.
नेमके काय घडले?
समय रैनाच्या शोमध्ये रणवीरने एका स्पर्धकाला विचारले – “तुला तुझ्या पालकांना आयुष्यभर सेक्स करताना पाहायला आवडेल, की त्यांच्याबरोबर सामील होऊन हे कायमचं थांबवायला आवडेल?” या धक्कादायक प्रश्नानंतर वेळ न घालवता समय रैना म्हणतो की, “हे सर्व त्याच्या पॉडकास्टचे रिजेक्ट झालेले प्रश्न आहेत.” शोमध्ये हा संवाद सुरू असताना उपस्थित काही लोक हसले, मात्र सोशल मीडियावर हा प्रकार अनेकांना अजिबात पटलेला नाही.
नेटकऱ्यांचा संताप
रणवीरच्या या प्रश्नाची क्लिप व्हायरल झाल्यानंतर नेटिझन्सनी त्याला अक्षरशः धारेवर धरले आहे. अनेकांनी त्याच्या कंटेंटवर आणि त्याच्या विचारसरणीवर प्रश्नचिन्ह उपस्थित केले आहे. लोक युट्यूब क्रिएटर्सच्या जबाबदारीवरही प्रश्न विचारत आहेत – अशा प्रकारच्या विनोदांना मजेशीर मानले जाऊ शकते का? युट्यूबवर असा कंटेंट का व्हायरल होतो? हे सर्व पाहून अनेकांनी #BoycottRanveerAllahbadia हा हॅशटॅग वापरून त्याच्या कंटेंटवर बहिष्कार टाकण्याची मागणी केली आहे.
लेखक नीलेश मिश्रा यांची थेट टीका – “विकृत क्रिएटर्स…”
प्रसिद्ध लेखक आणि पत्रकार नीलेश मिश्रा यांनीही रणवीरच्या वक्तव्यावर कठोर शब्दांत टीका केली. त्यांनी ट्विटर (X) वर रणवीरच्या क्लिपसह पोस्ट शेअर करत म्हटले –
“आपल्या देशाच्या क्रिएटिव्ह अर्थव्यवस्थेला आकार देणाऱ्या विकृत क्रिएटर्सना भेटा!
अशा लोकांचे लाखो फॉलोअर्स असतील, याची मला खात्री आहे. हा कंटेंट अडल्ट म्हणून वर्गीकृतही नाही. अल्गोरिदममध्ये आल्यास एखादा लहान मुलगाही हा व्हिडीओ सहज पाहू शकतो. क्रिएटर्स किंवा प्लॅटफॉर्म्सची काही जबाबदारी नाही.”
त्यांनी पुढे प्रेक्षकांनाही जबाबदार धरले आणि असे कंटेंट लोकांपर्यंत पोहोचण्यामागे कारणीभूत असल्याचे सांगितले. “हे क्रिएटर्स फक्त पैसे कमवण्यासाठी आणि प्रसिद्धीसाठी खालच्या थराला जात आहेत. अभिव्यक्ती स्वातंत्र्याच्या नावाखाली हे सर्व चालवले जाते,” असेही त्यांनी आपल्या पोस्टमध्ये लिहिले.
रणवीर अलाहाबादियाच्या कारकिर्दीला मोठा धक्का ?
रणवीर हा भारतातील एक लोकप्रिय युट्यूबर असून, त्याचा पॉडकास्ट ‘BeerBiceps’ मोठ्या प्रमाणावर प्रसिद्ध आहे. मात्र, या वादग्रस्त वक्तव्यामुळे त्याच्या ब्रँड व्हॅल्यूला फटका बसण्याची शक्यता आहे. काही प्रेक्षकांनी त्याच्या शोवर बहिष्कार टाकण्याची मागणी केली आहे. आता रणवीर किंवा समय रैना यांच्याकडून यावर अधिकृत स्पष्टीकरण येते का, हे पाहणे महत्त्वाचे ठरेल. पण निश्चितच, या संपूर्ण प्रकरणामुळे भारतीय सोशल मीडियावर मोठा वाद निर्माण झाला आहे.
