अहमदनगर Live24 टीम, 5 ऑगस्ट 2021 :- संगमनेर नगरपालिका व पोलीस प्रशासनाने संयुक्तरित्या शहरातील एका मंगल कार्यालय सह सात दुकाने सील केली आहे. संगमनेर शहर व तालुक्यात करोनाचे रुग्ण वाढत असताना प्रशासनाने सूचना देऊनही शहरातील व्यावसायिक या सूचनांचे पालन करत नसल्याने हि कारवाई करण्यात आली आहे.
जिल्ह्यात कोरोनाची लाट ओसरत असताना पुन्हा एकदा कोरोनाची आकडेवारी वाढताना दिसून येऊ लागली आहे. यामुळे प्रशासन पुन्हा एकदा सतर्क झाले आहे. शहरातील अनेक दुकानांमध्ये सोशल डिस्टन्सिंगचे नियम पाळले जात नाही, याशिवाय मास्क न लावताच व्यवहार सुरू असल्याचे दिसून येत आहे.
अनेक मंगल कार्यालयांमध्ये लग्न व साखरपुड्याचे कार्यक्रम धूमधडाक्यात सुरू आहेत. मोठ्या गर्दीत हे कार्यक्रम सुरू असल्याने करोनाचा प्रादुर्भाव वाढण्याची शक्यता वाढली आहे. या पार्श्वभूमीवर काल सायंकाळी संगमनेर नगरपालिका व पोलिस प्रशासन यांनी संयुक्त कारवाई केली.
पोलीस निरीक्षक मुकुंदराव देशमुख हे स्वतः या कारवाईत सहभागी झाले होते. संगमनेर नगरपालिकेचे कर्मचारी आणि पोलीस यांनी काल सायंकाळी शहरात पाहणी केली असता अनेक दुकानात नियमांचे उल्लंघन होत असल्याचे त्यांच्या निदर्शनास आले. यामुळे या दुकानांना सील लावण्यात आले आहे.
शहरातील निमाई स्वीट, नाईस कलेक्शन, बी एम स्वीट्स, बेकरी, कॉलेज कॉर्नर जवळील हॉटेल व पार्लर या दुकानांवर कारवाई करण्यात आली आहे. प्रशासनाच्या कारवाईमुळे व्यापारी वर्गात खळबळ उडाली आहे. कोरोनाचा वाढता धोका पाहता नागरिकांनी नियमांचे पालन करावे असे आवाहन प्रशासनाने केले आहे.
- अहमदनगर जिल्ह्यातील ब्रेकिंग बातम्यांसाठी आम्हाला फॉलो करा
- फेसबुक । ट्विटर । टेलिग्राम । युट्युब। गुगल न्यूज । इंस्टग्राम