अहमदनगर Live24 टीम, 19 जुलै 2021 :- छत्रपती शिवाजी महाराज यांच्या विषयी वादग्रस्त वक्तव्य केल्याप्रकरणी गुन्हा दाखल असलेला भाजपचा माजी उपमहापौर श्रीपाद शंकर छिंदम (वय 35) याच्या विरोधात न्यायालयात 60 पानांचे दोषारोपपत्र दाखल करण्यात आले आहे.
सोमवारी दुपारी दोषारोपपत्र दाखल करण्यात आलेले असून यामध्ये सहा साक्षीदारांचे जबाब नोंदविण्यात आले असल्याची माहिती तोफखाना पोलिस ठाण्याचे सहाय्यक पोलिस निरीक्षक तथा तपासी अधिकारी किरण सुरसे यांनी दिली आहे.
फेब्रुवारी २०१८ मध्ये छिंदम नगरचा उपमहापौर होता. त्यावेळी महापालिकेच्या बांधकाम विभागाचे कर्मचारी अशोक बिडवे यांच्याशी दूरध्वनीवरून वाद घालताना त्याने शिवरायांबद्दल अपशब्द वापरले होते.
शिवसेनेचे शहर प्रमुख दिलीप सातपुते यांच्या फिर्यादीवरून त्याच्याविरूद्ध गुन्हा दाखल झाला होता. हे प्रकरण राज्यभर गाजले. त्यानंतर भाजप कडून उपमहापौरपदाचा राजीनामा घेऊन त्याची पक्षातून हकालपट्टी करण्यात आली होती. या गुन्ह्यात त्याला अटक झाली.
दोषारोपपत्र दाखल करण्यासाठी आवश्यक परवानगी मिळविण्यासाठी मोठा काळ गेला. मधल्या काळात पुन्हा अपक्ष म्हणून निवडणूक लढवून तो विजयी झाला होता. मात्र, त्याचे हे पद नंतर रद्द करण्यात आले. एका टपरीचालकाला जातीवाचक शिवीगाळ केल्याचा गुन्हा त्याच्याविरूद्ध दाखल झाला आहे.
- अहमदनगर जिल्ह्यातील ब्रेकिंग बातम्यांसाठी आम्हाला फॉलो करा
- फेसबुक । ट्विटर । टेलिग्राम । युट्युब। गुगल न्यूज । इंस्टग्राम
