अहमदनगर Live24 टीम, 3 सप्टेंबर 2021 :- काल काँग्रेस पदाधिकार्‍यांच्या टीमने एमआयडीसीतील बहुचर्चित तथाकथित आयटी पार्कला भेट घेऊन राष्ट्रवादीच्या आमदारांच्या खोट्या कारभाराची पोलखोल केली. त्यावर त्यांच्या पायाखालची वाळू सरकली. यामुळेच माझ्यावरती काल मध्यरात्री विनयभंगाचा खोटा गुन्हा त्यांनी दाखल केला आहे.
नगरकरांसाठी, नगर शहरातल्या तरुणाईसाठी मी अग्नी परिक्षेला सामोरे जायला सर्वतोपरी तयार असून आज दिनांक ३ सप्टेंबर २०२१ रोजी दुपारी १२.१५ वाजता जाहीर पत्रकार परिषदेमध्ये काल आयटी पार्क मध्ये नेमके खरे काय घडले याची ऑडिओ व्हिडिओ सह सीडी वाजवणार असल्याची घोषणा शहर काँग्रेसचे जिल्हाध्यक्ष किरण काळे यांनी केली आहे.
राष्ट्रवादीच्या आमदारांनी नगर शहरातील तरुण त्यांचे पालक आणि मतदारांची आयटी पार्क सुरू करतो, हजारो मुलांना नोकरी देतो असे म्हणून फसवणूक केली. याबद्दल आयटी पार्कला प्रत्यक्ष भेट देत पाहणी करत याबाबत वास्तव नगरकरांच्या समोर मांडले होते.
या संदर्भातील बातम्या काल दुपारपासून समाज माध्यमांवर व्हायरल झाल्या होत्या. त्यानंतर अचानकपणाने सूत्रे हलू लागली. रात्री उशिरापर्यंत सर्व प्रकार सुरू होता.
राष्ट्रवादी काँग्रेस पक्षाच्या वतीने पक्षाचे पदाधिकारी स्वतः एमआयडीसी पोलीस ठाण्यामध्ये ठाण मांडून होते. त्यानंतर रात्री उशिरा किरण काळे यांच्या सह सात ते आठ जणांविरुद्ध विनयभंगासह इतर गुन्हे दाखल करण्यात आले आहेत.
याबाबत खरं नेमकं काय घडलं याचं लाईव्ह फुटेज काँग्रेसच्या वतीने पत्रकारांना दाखविण्यात येणार असून त्यासाठी किरण काळे यांची पत्रकार परिषद आयोजित करण्यात आली असल्याची माहिती शहर काँग्रेसचे जिल्हा उपाध्यक्ष गारदे यांनी दिली आहे.
- अहमदनगर जिल्ह्यातील ब्रेकिंग बातम्यांसाठी आम्हाला फॉलो करा
- फेसबुक । ट्विटर । टेलिग्राम । युट्युब। गुगल न्यूज । इंस्टग्राम