Post Office RD : शेअर बाजार आणि त्याच्याशी संबंधित गुंतवणुकीच्या पर्यायांमध्ये उच्च परताव्यासह, उच्च जोखीम देखील आहे. जोखीम घेण्याची क्षमता असलेल्या गुंतवणूकदारांसाठी हे खूप चांगले पर्याय आहेत. दुसरीकडे, असे गुंतवणूकदार आहेत जे कोणतीही जोखमी घेऊ इच्छित नाहीत, किंवा गुंतवणुकीत धोका पत्करू इच्छित नाहीत. अशा गुंतवणूकदारांसाठी पोस्ट ऑफिसमध्ये गुंतणूक करणे फायद्याचे ठरते, कारण, पोस्ट ऑफिस हे देशातील एकमेव ठिकाण आहे जिथे भारत सरकार जमा केलेल्या पैशांच्या सुरक्षिततेची हमी देते.
जर तुम्हाला कोणतीही जोखीम न घेता आपल्या गुंतवणुकीवर उत्तम परतावा हवा असेल तर, तुम्ही पोस्ट ऑफिसच्या आवर्ती ठेव योजनेत गुंतवणूक करू शकता. येथे तुम्हाला चांगल्या परताव्यासह पैशांच्या सुरक्षिततेची हमी देखील मिळते. पोस्ट ऑफिसच्या आरडीमध्ये सध्या 6.5 टक्के व्याज मिळत आहे. यामध्ये व्याजाची चक्रवाढ तिमाही आधारावर केली जाते.
पोस्ट ऑफिस रिकरिंग डिपॉझिट (PORD) मध्ये दरमहा किमान 100 रुपये गुंतवले जाऊ शकतात. गुंतवणुकीची कमाल मर्यादा नाही. तुम्ही 10 च्या पटीत तुम्हाला पाहिजे तितकी गुंतवणूक करू शकता.
जर तुम्ही PORD मध्ये 10,000 मासिक गुंतवणूक करत असाल, तर 5 वर्षांनंतर तुम्हाला मॅच्युरिटीवर 7,09,902 रुपये मिळतील. यामध्ये तुमची एकूण गुंतवणूक 6 लाख रुपये असेल आणि तुम्हाला 1,09,902 रुपये हमी व्याज मिळेल. PORD खाते 5 वर्षांच्या मॅच्युरिटीनंतर आणखी 5 वर्षांसाठी वाढवता येते. अशाप्रकारे, जर तुम्ही 10 वर्षांसाठी ही गुंतवणूक करत राहिलात, तर तुमचा एकूण हमी निधी 16,89,871 रुपये होईल. यामध्ये व्याजातून 4,89,871 रुपये व्याज मिळतील.
पोस्ट ऑफिसच्या आवर्ती ठेव योजनेत कोणताही धोका नाही. पोस्ट ऑफिसच्या छोट्या बचत योजनांवर सार्वभौम हमी आहे. कारण हा पैसा सरकार थेट वापरते. म्हणूनच या योजनांमध्ये गुंतवणूकदारांचे पैसे पूर्णपणे सुरक्षित आहेत.
PORD खाते कोणत्याही पोस्ट ऑफिस शाखेत 100 रुपयांमध्ये उघडता येते. यामध्ये व्यक्ती कितीही खाती उघडू शकते. यामध्ये सिंगल व्यतिरिक्त जास्तीत जास्त 3 व्यक्तींसाठी संयुक्त खाते उघडता येते. अल्पवयीन मुलांसाठी पालक खाते उघडू शकतात. पोस्ट ऑफिस आरडी खात्याची परिपक्वता 5 वर्षे आहे. परंतु, प्री-मॅच्युअर क्लोजर ३3 वर्षांनी करता येते.
येथे गुंतवणूक करण्याची एक चांगली गोष्ट म्हणजे, तुम्हाला पोस्ट ऑफिसमधील आरडी खात्यावर कर्ज घेता येते. नियम असा आहे की, 12 हप्ते जमा केल्यानंतर खात्यात जमा केलेल्या रकमेच्या 50% पर्यंत कर्ज घेता येते. कर्जाची परतफेड एकरकमी किंवा हप्त्यांमध्ये करता येते. कर्जाचा व्याजदर RD वरच्या व्याजापेक्षा 2% जास्त असेल. त्यात नॉमिनेशनचीही सोय आहे.