Ahmednagar City News : नगर कल्याण महामार्गावरील नेप्ती चौकाजवळील सीना नदीवर नवा पूल उभारण्यात येणार असून, त्याचे भूमिपूजन गुरुवारी (दि.२३) सायंकाळी ४ वाजता खा. डॉ. सुजय विखे पाटील व आ. संग्राम जगताप यांच्या उपस्थितीत होणार आहे.
कल्याण विशाखापट्टणम राष्ट्रीय महामार्गावर नगर शहरातील नेप्ती चौकाजवळ सीना नदीवर हा नवा पूल बांधण्यात येणार आहे.
सध्याचा येथील पूल जुना झाला असून, तो उंच नसल्याने पावसाळ्यात सीना नदी पुराचे पाणी या पुलावर येते. परिणामी नगर कल्याण महामार्ग वाहतूक ठप्प होते तसेच या परिसरातील शिवाजीनगर, नालेगाव, भूषणनगर या भागातील शहरांतर्गत वाहतूकही विस्कळीत होते.
या पार्श्वभूमीवर नव्याने येथे होणाऱ्या दुपदरी उंच पुलाने नगर कल्याण राष्ट्रीय महामार्गावरील वाहतुकीसह स्थानिक वाहतुकीचाही प्रश्न कायमस्वरूपी सुटणार आहे. भूमिपूजन कार्यक्रमास भाजपचे शहर जिल्हाध्यक्ष अॅड. अभय आगरकर, राष्ट्रवादी काँग्रेसचे जिल्हा शहराध्यक्ष प्रा. माणिकराव विधाते, शिवसेना दक्षिण जिल्हाध्यक्ष अनिल शिंदे, महापौर रोहिणीताई शेंडगे यांची प्रमुख उपस्थिती असणार आहे.
पुलाच्या कामाच्या निधीसाठी सुजय विखे आणि संग्राम जगताप यांनी केंद्रीय वाहतूक आणि महामार्ग मंत्री नितीन गडकरी, मुख्यमंत्री एकनाथ शिंदे, उपमुख्यमंत्री देवेंद्र फडणवीस व उपमुख्यमंत्री अजित पवार यांच्याकडे मागणी केली होती.
त्याची दखल घेऊन निधी मंजूर करण्यात आला आहे. सिना नदीवर जोड रस्ते व काँक्रिट गटारसह मोठ्या पुलाचे बांधकाम करण्यासाठी रस्ते वाहतूक व महामार्ग मंत्रालयाच्या वार्षिक योजना सन २०२२-२३ अंतर्गत रु. २७.१६ कोटी रकमेस मंजुरी देण्यात आली आहे.
निधीतून पुलाच्या बांधकामात जोड रस्ते, संरक्षक भिंत, फुटपाथसह काँक्रिट गटार, पथदिवे, ठिकाणी संगमस्थान सुधारणा यातून पुलाचे सुशोभिकरणही होणार आहे. पुलासाठी निधी मंजूर केल्याबद्दल केंद्रीय मंत्री नितीन गडकरी, मुख्यमंत्री एकनाथ शिंदे, उपमुख्यमंत्री देवेंद्र फडणवीस, उपमुख्यमंत्री अजित पवार, महसूल मंत्री राधाकृष्ण विखे पाटील यांचे खासदार डॉ. सुजय विखे आणि आमदार संग्राम जगताप यांनी आभार मानले आहेत.