Gautam Adani: आशियातील सर्वात श्रीमंत व्यक्ती गौतम अदानी (Gautam Adani) यांची कंपनी अदानी डेटा नेटवर्कला (Adani Data Network) अ‍ॅक्सेस सेवांसाठी युनिफाइड परवाना (Unified License) मिळाला आहे. म्हणजेच आता ही कंपनी देशातील सर्व दूरसंचार सेवा (telecommunication services) पुरवण्यास सक्षम झाली आहे. देशात अलीकडेच झालेल्या 5G स्पेक्ट्रम लिलावात (5G spectrum auction) स्पेक्ट्रम खरेदी केल्यानंतर अदानी समूहाने दूरसंचार क्षेत्रात प्रवेश केला.
अदानी समूहाने दूरसंचार क्षेत्रात प्रवेश करताना सांगितले होते की, ते त्यांच्या डेटा केंद्रांसह त्यांच्या सुपर अॅप्ससाठी एअरवेव्ह वापरण्याची योजना करत आहेत. हे वीज वितरणापासून विमानतळ आणि बंदरांपर्यंत गॅसच्या किरकोळ विक्रीला समर्थन देईल. पीटीआयच्या म्हणण्यानुसार, या प्रकरणाशी संबंधित दोन अधिकृत सूत्रांनी सांगितले की, अदानी डेटा नेटवर्क्सला यूएल देण्यात आले आहे. सोमवारी हा परवाना अदानी समूहाला देण्यात आल्याचे अहवालात म्हटले आहे. मात्र, अदानी समूहाकडून याबाबत अद्याप कोणतीही अधिकृत घोषणा करण्यात आलेली नाही.
मुकेश अंबानींशी थेट स्पर्धा?
मुकेश अंबानी (Mukesh Ambani) आणि गौतम अदानी हे दोघे उद्योगपती गुजरातचे आहेत. आतापर्यंत दोन्ही गट वेगवेगळ्या क्षेत्रात कार्यरत आहेत. आणि त्यांच्यात थेट स्पर्धा नाही. मुकेश अंबानींचा रिलायन्स समूह तेल, रिफायनरी आणि पेट्रोकेमिकल्सपासून दूरसंचार आणि किरकोळ क्षेत्रांपर्यंत काम करतो.
त्याच वेळी, अदानी समूह बंदर, कोळसा, हरित ऊर्जा, वीज वितरण आणि विमान वाहतूक क्षेत्रात आहे. परंतु अलीकडच्या काळात अदानी समूहाने पेट्रोकेमिकल क्षेत्रात प्रवेश केला असताना रिलायन्स समूहानेही हरित ऊर्जा क्षेत्रात प्रवेश केला आहे. आता दूरसंचार क्षेत्रात अदानी समूहाचा प्रवेश ही या दोघांमधील पहिली थेट स्पर्धा आहे.