Retirement Plans : सध्या महिला स्वावलंबी होत आहेत. महिला सध्या प्रत्येक क्षेत्रात पुढे आहेत. अशातच महिलांसाठी बाजारात एका पेक्षा एक बचत योजना चालवल्या जातात, ज्या त्यांना स्वावलंबी बनवण्यास मदत करतात. भविष्यात मुलांवर किंवा पती वर अवलंबून न राहता महिला या योजनांमध्ये गुंतवणूक करून अगदी आरामात आयुष्य जगू शकतात.
महिलांना स्वावलंबी जीवन जगायचे असेल तर त्यांनी त्याचे आगाऊ नियोजन करणे फार आवश्यक आहे. जेणेकरुन म्हातारपणी लहानसहान गरजांसाठी कोणाकडेही पैसे मागावे लागणार नाही. सरकारद्वारे अशा अनेक योजना चालवल्या जातात, ज्याचा लाभ घेऊन नियमित पेन्शन मिळू शकते. तुम्ही जितक्या लवकर गुंतवणूक सुरू कराल तितके तुमच्यासाठी चांगले होईल. तुमचा भविष्यातील खर्च आणि उत्पन्न लक्षात घेऊन तुमची पेन्शन योजना निवडली पाहिजे. आज आम्ही अशाच काही पेन्शन योजना घेऊन आलो आहोत, ज्या महिलांसाठी खूप फायद्याच्या ठरतील.
यूएलआईपी योजना
युनिट लिंक्ड इन्शुरन्स प्लॅन (युलिप प्लॅन) महिलांसाठी सर्वोत्तम गुंतवणूक पर्याय बनू शकतो. यामध्ये जीवन विम्यासोबतच गुंतवणुकीची सुविधाही उपलब्ध आहे. मुदतपूर्तीनंतर नियमित पेन्शनचा लाभ मिळतो. एलआयसीसह अनेक विमा कंपन्या सध्या युलिप योजना चालवत आहेत.
म्युच्युअल फंड
म्युच्युअल फंडामध्ये तुम्हाला मजबूत परतावा मिळू शकतो. तुम्ही SIP अंतर्गत मासिक प्रीमियम भरू शकता. त्याच वेळी, SWP द्वारे, तुम्हाला उत्पन्न मिळू शकते, म्हणजे निश्चित कालावधीसाठी पेन्शन.
अटल पेन्शन योजना
अटल पेन्शन योजना देखील गुंतवणुकीसाठी सर्वोत्तम पर्याय बनू शकते. ज्यांचे उत्पन्न जास्त नाही त्यांच्यासाठी ही योजना योग्य आहे. 18 ते 40 वर्षे वयोगटातील कोणीही या योजनेचा लाभ घेऊ शकतात. या योजनेंतर्गत, वयाची ६० वर्षे पूर्ण झाल्यानंतर 1000 ते 5000 रुपये पेन्शन मिळते.
राष्ट्रीय पेन्शन योजना
राष्ट्रीय पेन्शन योजना ही महिलांसाठी सर्वोत्तम पेन्शन योजनांपैकी एक आहे. गुंतवणूक आणि वयाच्या आधारे पेन्शन मिळते. जर एखाद्या महिलेने वयाच्या 30 व्या वर्षी दरमहा 5000 रुपये गुंतवले तर वयाची 60 वर्षे पूर्ण केल्यानंतर तिला सुमारे 45,000 रुपये पेन्शन मिळते.
LIC जीवन अक्षय 7 पेन्शन योजना
एलआयसीची ही अ‍ॅन्युइटी योजना गुंतवणुकीसाठी एक चांगला पर्याय बनू शकते. पॉलिसी वयाच्या ३० व्या वर्षी खरेदी केली जाऊ शकते. किमान खरेदी किंमत 1 लाख रुपये आहे. जास्तीत जास्त गुंतवणुकीवर मर्यादा नाही.