Mahindra Electric Car : देशात गेल्या काही महिन्यांपासून इंधनाच्या किमती (Fuels Rate) गगनाला भिडल्या आहेत. त्यामुळे अनेकजण आता इलेक्ट्रिक गाड्यांचा (Electric Car) पर्याय निवडत आहेत. अनके कंपन्यांनी इलेक्ट्रिक कार बाजारात लॉन्च केल्या आहेत. आता महिंद्रा कंपनी पुन्हा एकदा मार्केट गाजवण्यासाठी सज्ज झाली आहे.
भारतात इलेक्ट्रिक वाहनांची संख्या सातत्याने वाढत आहे. गेल्या काही वर्षांत अनेक कंपन्यांनी त्यांच्या इलेक्ट्रिक कारचे अनेक मॉडेल्स लॉन्च केले आहेत. आता या क्रमाने, भारतीय ऑटोमेकर महिंद्रा लवकरच भारतात नवीन 2-दरवाज्यांची क्वाड्रिसायकल इलेक्ट्रिक कार लॉन्च करणार आहे.
या कारचे नाव महिंद्रा अॅटम (Mahindra Atom) असे असणार आहे. कंपनीने ही कार 2020 ऑटो एक्सपोमध्ये सादर केली होती. लॉन्च होण्यापूर्वीच त्याची बरीच माहिती मीडियामध्ये लीक झाली आहे. ही देशातील पहिली क्वाड्रिसायकल इलेक्ट्रिक कार असणार आहे.
लुक कसा असणार?
महिंद्र अॅटमला दोन खिडक्यांसह सिंगल वायपर, एक अनोखी ग्रिल डिझाइन, ब्लॅक-आउट पिलर, एलईडी हेडलॅम्प, फ्लॅट विंडस्क्रीन याला शोभिवंत लुक देण्यात आला आहे. ही कार दिसायला खूपच बॉक्सी आहे. कार मोनोकोक चेसिसवर आधारित आहे. मागील चाके थोडी फार मागे आहेत, ज्यामुळे ते वेगळे आणि भविष्यवादी बनते.
चार प्रकारांमध्ये उपलब्ध
इंटरनेटवर लीक झालेल्या माहितीनुसार, महिंद्रा अॅटम K1, K2, K3 आणि K4 अशा एकूण चार प्रकारांमध्ये बाजारात उतरणार आहे. ज्यामध्ये K1 मध्ये 7.4 kWh, K2 मध्ये 144 Ah लिथियम-आयन बॅटरी पॅक आणि K3 ला 11.1 kWh आणि K4 ला 216 Ah बॅटरी पॅक मिळेल. त्याच्या लहान आणि मोठ्या बॅटरीचे वजन अनुक्रमे 98 किलो आणि 145 किलो असेल.
काय असतील वैशिष्ट्ये
या इलेक्ट्रिक क्वाड्रिसायकलच्या आतील भागात 4G कनेक्टिव्हिटीसह सुसज्ज इन्फोटेनमेंट पॅनेल मिळेल, ज्यामध्ये अनेक सुविधा उपलब्ध असतील. यामध्ये बॅटरीच्या क्षमतेनुसार एसी आणि नॉन एसी पर्याय उपलब्ध असतील.
आतापर्यंत मिळालेल्या माहितीनुसार, त्याचे K1 आणि K2 प्रकार एकदा पूर्ण चार्ज केल्यानंतर 80 किमीपर्यंत जाऊ शकतात. त्याचे K3 आणि K4 प्रकार पूर्ण चार्ज केल्यावर 100 किमी पर्यंतची रेंज देऊ शकतात.
किती खर्च येईल?
महिंद्रा आपल्या अॅटम इलेक्ट्रिक कारची प्रारंभिक एक्स-शोरूम किंमत 3 लाख रुपये ठेवू शकते, ज्याची अद्याप पुष्टी झालेली नाही. सध्या भारतीय बाजारपेठेत या कारला टक्कर देण्यासाठी कोणतेही मॉडेल उपलब्ध नाही.