SBI ATM Charges : भारतातील सर्वात मोठी बँक SBI आपल्या काही ग्राहकांना ATM सुविधा मोफत देत आहे, जिथे अनेक बँका ATM वापरासाठी काही प्रमाणात शुल्क आकारतात तिथेच SBI ही सेवा विनाशुल्काशिवाय देत आहे.
भारतीय बँका सहसा त्यांच्या ग्राहकांना दर महिन्याला मर्यादित संख्येत एटीएम व्यवहार करण्याची सुविधा देतात. बँकांनी ठरवून दिलेल्या मर्यादेनंतर एटीएममधून पैसे काढण्यासाठी बँका शुल्क आकारतात. बँका अमर्यादित एटीएम व्यवहारांची सुविधा देखील देतात, परंतु यासाठी ग्राहकांना काही अटी पूर्ण कराव्या लागतात. भारतातील सर्वात मोठी बँक म्हणजे स्टेट बँक ऑफ इंडिया देखील हे शुल्क आकारते.
SBI चे शुल्क देखील व्यवहाराचे स्वरूप आणि शहराच्या प्रकारावर अवलंबून असते. म्हणजे मेट्रो आणि सामान्य शहरांसाठीचे शुल्क वेगळे आहेत. याशिवाय, एसबीआय एटीएम कार्ड धारकाला एसबीआय एटीएम कार्ड वापरून इतर कोणत्याही बँकेच्या एटीएममधून पैसे काढण्यासाठी अधिक पैसे द्यावे लागतील.
प्रत्येक बँक ग्राहकाला एटीएम कार्डच्या शुल्काविषयी माहिती असणे महत्त्वाचे आहे. यामुळे ग्राहक अनावश्यक शुल्क तर टाळतातच शिवाय शुल्काबाबत जाणून घेतल्यानंतर बँक कर्मचाऱ्यांशी विनाकारण वाद घालण्याची गरज नाही. आज आम्ही तुम्हाला SBI एटीएम चार्जेसबद्दल सविस्तर सांगणार आहोत.
देशातील सर्वात मोठी बँक आपल्या ग्राहकांना काही अटींच्या अधीन राहून त्यांच्या स्वतःच्या ATM तसेच इतर बँकांच्या ATM मध्ये अमर्यादित मोफत ATM व्यवहार प्रदान करते. एसबीआय सेव्हिंग्ज बँक खात्यात 25,000 रुपयांपेक्षा जास्त मासिक शिल्लक ठेवणारे ग्राहक बँकेच्या एटीएम नेटवर्कमध्ये अमर्यादित एटीएम व्यवहार करू शकतात. तर, इतर बँकांच्या एटीएममध्ये या सुविधेचा लाभ घेण्यासाठी, एसबीआय ग्राहकाला 1 लाख रुपये शिल्लक ठेवावे लागतील.
एसबीआय बचत खात्यात 1 लाख रुपयांपर्यंत मासिक शिल्लक असलेले ग्राहक देशातील सहा मेट्रो शहरांतील मुंबई, नवी दिल्ली, चेन्नई, कोलकाता, बेंगळुरू आणि हैदराबादमधील इतर बँकांच्या एटीएममधून 3 विनामूल्य व्यवहार करू शकतात. त्याचबरोबर इतर शहरांमध्ये सहा व्यवहार मोफत करता येणार आहेत.
जर एखाद्या SBI बँक खातेधारकाने त्याच्या खात्यात 25,000 रुपये मासिक शिल्लक ठेवली तर त्याला SBI ATM मध्ये एका महिन्यात पाच विनामूल्य व्यवहार मिळतील. ज्यांच्या खात्यात 25,000 रुपयांपेक्षा जास्त रक्कम आहे त्यांना अमर्यादित व्यवहारांची सुविधा मिळते. जर एसबीआय खातेधारकाला इतर बँकांमध्येही अमर्यादित एटीएम व्यवहार करायचे असतील, तर त्याला 1 लाख रुपये मासिक सरासरी शिल्लक ठेवावी लागेल.